На адным з беларускіх палігонаў «праз няштатную сітуацыю» загінуў вайсковец, курсант Вайсковай акадэміі, паведамілі ў Мінабароны.
«Міністэрствам абароны распачатая праверка па факце гібелі вайскоўца ўзброеных сіл. Паводле папярэдняй інфармацыі, праз няштатную сітуацыю ў паветры падчас дэсантавання з самалёта Ан-2 на адным з палігонаў вайсковец атрымаў траўму, несумяшчальную з жыццём», — гаворыцца ў паведамленні.
Падрабязнасці інцыдэнту не ўдакладняюцца. Абставіны здарэння высвятляе камісія Мінабароны сумесна са Следчым камітэтам. На месца здарэння выехаў намеснік міністра абароны.
Вайсковец вучыўся на трэцім курсе аднаго з факультэтаў Вайсковай акадэміі, «па службе і ў вучобе характарызаваўся станоўча, меў неаднаразовы досвед дэсантавання».
«Вайсковае ведамства выказвае спачуванні родным і блізкім шарагоўца. Службовыя асобы знаходзяцца на сувязі са сваякамі. Сям'і загінулага будзе аказаная ўсебаковая дапамога. Ход правядзення праверкі — на асабістым кантролі міністра абароны», — расказалі ў ведамстве.