Як мінімум пяць чалавек загінулі ў выніку тэракту ў Ерусаліме (Ізраіль), паведамляе The Times of Israel.
Паводле інфармацыі ізраільскіх СМІ, у раёне Рамот невядомыя зайшлі ў аўтобус № 62 і пачалі страляніну. У выніку тэракту як мінімум пяць чалавек загінулі, больш за 15 атрымалі раненні, з іх сямёра — у крытычным стане.
Паводле афіцыйных асоб, двое стралкоў былі «нейтралізаваныя» — пазней пацвердзілася, што яны былі застрэленыя сіламі бяспекі на месцы. Іх асобы пакуль не раскрываюцца.
Жанчына, якая была ў аўтобусе ў Ерусаліме, калі тэрарысты адкрылі агонь па пасажырах, расказала падрабязнасці трагедыі.
«Я была ў аўтобусе. Аўтобус быў перапоўнены, — расказала жанчына. — У той момант, калі [кіроўца] адчыніў дзверы… з’явіліся тэрарысты. Гэта было жудасна. Я была ля задніх дзвярэй, упала на ўсіх і вырвалася, я ўратавалася».
Яна кажа, што хавалася пад іншай машынай, што стаяла побач, пакуль страляніна не спынілася.
Мяркуючы з фота з месца здарэння, тэрарысты выкарыстоўвалі самаробны пісталет-кулямёт.
«Самаробная зброя звычайна вырабляецца на нелегальных станках на Заходнім беразе ракі Іярдан, і ў мінулым яна выкарыстоўвалася для шматлікіх нападаў з боку палестынцаў», — піша The Times of Israel.