Следчы камітэт завяршыў расследаванне аварыі са смяротным вынікам у Глыбоцкім раёне, дзе ў кастрычніку мінулага года загінулі тры чалавекі — муж і жонка і іх 17-гадовая дачка. Абвінавачанне выставілі 26-гадоваму кіроўцу красовера, паведамілі ў прэс-службе СК.
Паводле інфармацыі следства, увечары 25 кастрычніка 2024 года мужчына за рулём DS 7 Crossback ехаў аўтадарогай Р45 Полацк — Глыбокае — мяжа Літвы. Паблізу аграгарадка Празарокі ён выехаў на сустрэчную паласу і сутыкнуўся з Opel. У выніку ДТЗ кіроўца Opel, яго жонка і няпоўнагадовая дачка загінулі на месцы.
Каб аднавіць поўную карціну трагедыі, следчыя правялі маштабны комплекс працэсуальных дзеянняў і экспертыз. На месцы здарэння ў цёмны час сутак спецыялісты дэталёва зафіксавалі дзясяткі метраў слядоў, якія дазволілі вызначыць траекторыі руху аўтамабіляў, пункты сутыкнення і характар пашкоджанняў.
Прызначаныя экспертызы ахоплівалі шырокае кола пытанняў — ад тэхнічнага стану машын і хуткасці руху да фактараў, якія маглі спрыяць аварыі.
Асаблівая ўвага надавалася допыту адзінага выжылага ўдзельніка ДТЗ — кіроўцы DS 7. Яго паказанні супастаўляліся з сабранымі доказамі і паказаннямі сведак.
У выніку следства прыйшло да высновы пра вінаватасць мужчыны. Яго дзеянні кваліфікаваныя па ч. 3 арт. 317 КК (Парушэнне правілаў дарожнага руху, якое прывяло па неасцярожнасці да смерці трох чалавек).