Неапрацаваныя палі паміж Чэрвенем і Беразіном заўважыў з верталёта Аляксандр Лукашэнка падчас рабочага візіту ў Магілёўскую вобласць.
«Паміж Чэрвенем і Беразіном — я заўсёды за гэтыя раёны перажываю — катастрофа.
Палі неапрацаваныя! Так, мужыкі, справа не пойдзе», — сказаў палітык (цытата паводле прэс-службы).
У Магілёўскую вобласць з рабочым візітам Аляксандр Лукашэнка прыляцеў 28 жніўня. Палітык наведае ААТ «Рассвет» у Кіраўскім раёне, дзе ідзе ўборка бульбы.
«Вынікам наведвання стане нарада па развіцці бульбаводства ў Беларусі», — удакладнілі ў прэс-службе.
Нагадаем, у канцы ліпеня Аляксандр Лукашэнка падпісаў указ «Пра ўзмацненне адказнасці старшыняў райвыканкамаў», які вызначае падыходы «для павышэння выніковасці працы нізкаэфектыўных сельгасарганізацый».
Дакумент даручыў аблвыканкамам прымаць рашэнні наконт замацавання за старшынямі райвыканкамаў па адной стратнай сельгасарганізацыі.
У выпадку паляпшэння вынікаў дзейнасці замацаванай за кіраўніком раёна адсталай гаспадаркі будзе прымацца рашэнне пра выплату яму прэміі.
«А за невыкананне паказчыкаў не будзе ажыццяўляцца даплата за складанасць, напружанасць і інтэнсіўнасць працы, устаноўленая ў адпаведнасці з заканадаўствам», — тлумачылі ў прэс-службе.