Актыўна прыцягваць гандлёвыя сеткі да захоўвання і продажу бульбы даручыў чыноўнікам Аляксандр Лукашэнка. Адпаведнае распараджэнне ён даў 28 жніўня падчас рабочай паездкі ў Магілёўскую вобласць. Палітык таксама прыгразіў гандлёвым сеткам «сумнымі наступствамі» за адсутнасць на прылаўках крамаў «якаснай даступнай айчыннай бульбы».
Палітык упэўнены: сёлета захаваецца значны попыт на бульбу за межамі краіны, у тым ліку ў суседняй Расіі. Таму, на яго думку, было прынятае правільнае рашэнне ў гэтым сезоне павялічыць плошчы для вырошчвання гэтай гародніны.
Паколькі ўраджай бульбы чакаецца «дастатковы», Аляксандр Лукашэнка даручыў падрыхтаваць сховішчы для агародніны і забяспечыць захаванасць тавару да вясны. Палітык таксама падкрэсліў неабходнасць наладзіць «выразныя сувязі з гандлёвымі сеткамі», каб яны «своечасова пастаўлялі бульбу ў крамы» краіны і «не паўтарылася сітуацыя вясны гэтага года», піша БЕЛТА.
— Трэба глядзець, каб не гандлёвыя сеткі вамі кіравалі, а вы імі, — падкрэсліў Аляксандр Лукашэнка. — Гандляры павінныя падключацца на ўсю катушку.
Палітык таксама даручыў сачыць за напаўняльнасцю агароднінасховішчаў.
«Глядзіце, каб не было назапоўненых сховішчаў. Гэта — злачынства!» — заявіў Лукашэнка.
Пазней падчас нарады па развіцці бульбаводства палітык папрасіў прысутных данесці да людзей, «што бульбы ў нашай краіне, як заўсёды, дастаткова».
«Звяртаю ўвагу кіраўнікоў гандлёвых сетак, што адсутнасць у крамах якаснай даступнай айчыннай бульбы будзе мець для ўсіх сумныя наступствы», — прыгразіў Лукашэнка.
Сітуацыя з бульбай
Лукашэнка 8 траўня прызнаў, што ў краіне існуе дэфіцыт бульбы. На гэта раней скардзіліся беларусы, аднак чыноўнікі ўпарта абвяргалі. Лукашэнка патлумачыў недахоп бульбы жаданнем фермераў падзарабіць, маўляў, яны ўсё прадалі ў Расію, і прапанаваў сваю хітрую «сялянскую задуму» — пацярпець дэфіцыт на ўнутраным рынку, але затое зарабіць на РФ.
У краіне-суседцы словы Лукашэнкі абвяргаюць. Дэфіцыт бульбы ў Беларусі звязаны з неўраджаем 2024 года, а не з яго масавым вывазам у Расію, заявіў News.ru выканаўчы дырэктар Саюза ўдзельнікаў рынку бульбы і агародніны РФ Аляксей Красільнікаў.
27 траўня Беларусь зняла забарону на ўвоз і рэалізацыю ў краіне бульбы, цыбулі, капусты, яблыкаў, якія паходзяць з «недружалюбных» краін, уключаючы ўсе дзяржавы — сябры ЕС. Ва ўрадзе гэта назвалі «адказам на чарговыя санкцыі ЕС».
Прымаючы з дакладам старшыню Брэсцкага аблвыканкама Пятра Пархомчыка, Лукашэнка назваў пытанне з дэфіцытам бульбы сур’ёзным і заявіў, што «трэба вырасціць столькі, каб хапіла нам і Расіі».
Чытайце таксама
