Прадстаўнік Беларускага фонду спартыўнай салідарнасці Анатоль Котаў паляцеў у Турцыю 21 жніўня і з таго дня не выходзіць на сувязь. Што магло здарыцца з экс-чыноўнікам? І ці можа яго кейс стаць працягам справы Анжалікі Мельнікавай, зніклай яшчэ ў сакавіку? У новым выпуску нашага шоу «Як гэта разумець» гэта абмеркавалі палітычны аналітык Арцём Шрайбман і журналіст Глеб Сямёнаў.
Анатоль Котаў — былы генеральны сакратар Нацыянальнага алімпійскага камітэта Беларусі. Ён таксама працаваў у амбасадзе Беларусі ў Польшчы, дырэкцыі Еўрапейскіх гульняў і Кіраўніцтва справамі Лукашэнкі. Пасля 2020 года Котаў стаў правай рукой Паўла Латушкі, але пазней іх дарогі разышліся — і разышліся моцна. Вось ужо некалькі гадоў яны судзяцца праз адсутнасць фінансавай справаздачнасці. У Беларусі былога чыноўніка арыштавалі завочна і асудзілі на 12 гадоў пазбаўлення волі.
— Што ты думаеш пра знікненне Котава? Ці бачыш сувязь з таямнічым знікненнем былой спікеркі КР Анжалікі Мельнікавай?
— Мы бачым спектр магчымых тлумачэнняў, і ў мяне няма нейкіх аргументаў проста цяпер. З Мельнікавай мы маглі паступова выключаць асобныя версіі. З Котавым пакуль прайшло мала часу, каб упэўнена казаць пра нешта.
З Мельнікавай зразумела, што было нейкае ўцягванне спецслужбаў (улічваючы тое, што мы ведаем пра яе спадарожніка), відаць, з Беларусі (былая спікерка Каардынацыйнай рады Анжаліка Мельнікава знікла ў сакавіку 2025 года. Разам з жанчынай зніклі і дочкі, якія жылі з ёй у Варшаве. Журналісты высветлілі, што ў яе былі адносіны з 32-гадовым Аляксеем Лабеевым, які, як выявілася, працуе ва Упраўленні вайсковай контрразведкі КДБ. — Заўв. рэд.).
З Котавым пакуль ніякай інфармацыі няма, і таму не магу адказаць на тваё пытанне. Я бачу спектр сцэнараў: ад самых трагічных, што з ім магло нешта здарыцца фізічна, прамежкавых, дзе сапраўды адбылося завабліванне, экстрадыцыя, вярбоўка, да больш традыцыйных, што чалавек быў агентам ўвесь гэты час і проста вярнуўся дадому.
— Слухай, а калі б ён быў агентам, няўжо яго асудзілі б на 12 гадоў завочна?
— Ну гэта добрая канспірацыя.
— Неяк дзіўна. Ты думаеш, яны настолькі стратэгі?
— Ну калі ў цябе ёсць агент, трэба стварыць яму легенду. Каб, калі яго падазравалі, ён казаў: «Вы што, які я агент, у мяне 12 гадоў тэрмін». Таму ў цэлым усё магчыма.
Але не выключаныя і нейкія асабіста-псіхалагічныя сцэнары: пасварыўся з кімсьці, проста вырашыў пабыць у цішыні, адключыцца ад свету. Ці нешта здарылася са здароўем, ляжыць дзе-небудзь у бальніцы без сувязі. То-бок пакуль яшчэ ёсць велізарны спектр сцэнараў, версій, тлумачэнняў.
Я не ведаю Котава асабіста, каб мець магчымасць выключыць нейкую з гэтых версій. Мяркуючы, што сям’я падала, як паведамляюць СМІ, заяву і ў польскія, і ў турэцкія праваахоўныя органы, відаць, у іх няма ніякага ўяўлення пра тое, што з ім здарылася.
Чытайце таксама
