У Беларусі з 18 жніўня запрацавалі пенсійныя змяненні. Адно з іх датычыць тых, хто працуе на падатку на прафдаход (НПД). Ім дазволілі на ўласнае жаданне даплаціць унёскі ў бюджэт Фонду сацыяльнай абароны насельніцтва (ФСАН). Цяпер у фондзе ўдакладняюць: тым, хто хоча ўнесці грошы за 2024 год, зрабіць гэта можна да 30 верасня.
Нагадаем, падатак на прафесійны даход увялі ў Беларусі з 2023 года. Для тых, хто працуе з фізічнымі асобамі, падатак складае 10%. Такая ж стаўка для тых, хто працуе з юрасобамі, але да пэўнага памеру выручкі (да 60 тысяч рублёў), а пасля гэтага парогу падатковы збор у два разы вышэйшы — 20%.
Пра якія сумы ўнёскаў гаворка
Беларус, які працуе на НПД, у 2025 годзе атрымаў даход у 20 тысяч рублёў і заплаціў падатак памерам 2000 рублёў. У ФСАН пайшло 1200 рублёў, або 60% ад гэтай сумы.
Але каб унесеныя ўнёскі ў фонд залічылі для будучай пенсіі, трэба за год пералічыць 2 526,48 рубля. Для разліку гэтай сумы бяруць 29% ад мінімальнага заробку, які цяпер складае 726 рублёў, і памнажаюць на 12 месяцаў. Атрымліваецца, што беларусу з гэтага прыкладу трэба даплаціць у фонд яшчэ амаль 1327 рублёў, каб яму залічылі год працы для разліку пенсіі ў будучыні.
Да якой даты трэба пералічваць грошы
У ФСАН удакладняюць, што ўнёскі можна рабіць да 31 сакавіка наступнага года. Але ў 2025-м гэта трэба зрабіць да 30 верасня — гаворка пра плацяжы за 2024-ы.
Чытайце таксама
