Экспертка па нерухомасці Наталля Літоўская ў сваім тэлеграм-канале прааналізавала цяперашняе становішча на беларускім рынку жылля і дала параду, як дзейнічаць маладым сем’ям ва ўмовах, калі арэнда аднапакаёвай кватэры абыходзіцца амаль у тры разы танней, чым штомесячныя выплаты па іпатэцы.
Паводле эксперткі, на рынку жылля цяпер складваецца прыкметны разрыў паміж коштам арэнды і іпатэкай. Напрыклад, аднапакаёвыя кватэры ля станцыі метро «Каменная Горка» прадаюцца прыкладна за 95 тысяч даляраў, або амаль 283 тысячы рублёў. Падчас куплі з выкарыстаннем іпатэкі пакупніку трэба ўнесці 20% уласных сродкаў, а астатнюю суму дае банк. У гэтым выпадку штомесячны плацёж складзе каля 3570 рублёў.
Для параўнання: арэнда аналагічнай кватэры абыходзіцца ў 400 даляраў, то-бок прыкладна ў 1191 рубель у месяц. Такім чынам, арэнда аднапакаёўкі цяпер амаль утрая таннейшая, чым крэдытныя выплаты за ўласнае жыллё.
Літоўская адзначае, што сітуацыя на рынку жылля цыклічная. Калі цэны на кватэры і ўмовы іпатэкі становяцца недаступнымі, частка патэнцыйных пакупнікоў сыходзіць у арэнду. Гэта павышае попыт і цягне арэндныя стаўкі ўверх. Але, калі плацежаздольнасць насельніцтва зніжаецца, арандатары — часцей за ўсё маладыя сем'і — вяртаюцца да бацькоў, і тады цэны на арэнду падаюць. Адначасова таннеюць і кватэры, асабліва калі іпатэка перастае быць даступнай.
У такой сітуацыі, на думку эксперткі, выйграюць тыя, хто заняў чакальную пазіцыю і заняўся назапашваннем:
«Ловіць хвалю той, хто на піку ўзмоцнена збіраў, на спадзе пераехаў да бацькоў і збіраў з яшчэ большай стараннасцю, і на дне цэн (за свае) або пры першых прыкметах з’яўлення даступнай іпатэкі (за свае плюс крэдыт) — купіў», — тлумачыць яна.
Пры гэтым экспертка падкрэслівае: нягледзячы на высокі кошт нерухомасці, у маладых сем’яў усё роўна ёсць шанец вырашыць жыллёвае пытанне.
«Так, свая кватэра — дарагое задавальненне. Але 99% маладых сем’яў, якія пра яе мараць, рэалізуюць мару. І большасць з іх — цягам трох-пяці гадоў», — падсумавала Літоўская.
Чытайце таксама
