З 1 кастрычніка ў Беларусі ўвядуць змены што да разліку і аплаты жыллёва-камунальных паслуг. Адно з новаўвядзенняў датычыць тых, хто трапіў у базу «дармаедаў». Пра гэта 4 верасня на прэс-канферэнцыі паведаміла намесніца начальніка ўпраўлення эканомікі Мінжылкамгаса Анастасія Маліноўская.
«Калі сёння і, адпаведна, да 1 кастрычніка 2025 года налічэнне платы ў дачыненні да жылых памяшканняў, якія належаць не занятым у эканоміцы грамадзянам, ажыццяўляецца ў першую чаргу ў выпадку, калі такія грамадзяне зарэгістраваныя ў кватэрах, якія ім належаць, і прапарцыйна колькасці грамадзян, — удакладніла Анастасія Маліноўская. — То-бок незалежна ад таго, колькі з ім пражывае грамадзян».
Прадстаўніца Мінжылкамгаса прывяла прыклад для нагляднасці. Так, кватэра на 60 квадратных метраў належыць чалавеку, які трапіў у базу не занятых у эканоміцы. Акрамя ўласніка-«ўтрыманца» ў ёй зарэгістраваныя яшчэ два чалавекі, якія не лічацца не занятымі ў эканоміцы. Цяпер у такім выпадку ўладальнік-«дармаед» аплачвае поўнымі тарыфамі ацяпленне, гарачую ваду і газ, а астатнія — субсідыяванымі.
«Але з 1 кастрычніка 2025 года ў выпадку, калі грамадзянін трапіў у спіс не занятых у эканоміцы грамадзян і ён — уласнікам кватэр (прычым незалежна ад іх колькасці — адна, дзве ці больш), то ў дачыненні да ўсіх кватэр, у дачыненні да ўсяго аб’ёму спажываных паслуг цеплазабяспечання, гарачага водазабяспечання, падагрэву вады і газазабяспечання будуць ужытыя эканамічна абгрунтаваныя тарыфы», — удакладніла Анастасія Маліноўская.
Чытайце таксама
