Урад Польшчы прыняў рашэнне цалкам закрыць мяжу з Беларуссю. Пра гэта паведаміў прэм’ер-міністр краіны Дональд Туск 9 верасня перад пачаткам паседжання ўрада, перадаюць Onet.pl і інфармацыйнае агенцтва Reuters.
Туск адзначыў, што гэтая мера — адказ на сумесныя расійска-беларускія вучэнні «Захад-2025».
— Мы сутыкаемся з ростам колькасці правакацый з боку Расіі і Беларусі. Таму мы закрыем мяжу з Беларуссю, уключаючы чыгуначныя пераходы, у сувязі з вучэннямі «Захад» апоўначы з чацвярга на пятніцу, — заявіў прэм’ер-міністр Дональд Туск.
Нагадаем, сёння на беларуска-польскай мяжы дзейнічае пункт пропуску «Брэст» (для аўтамабільнага пасажырскага транспарту), а таксама «Казловічы» (для грузавога).
Пасажырскія чыгуначныя зносіны паміж Беларуссю і краінамі ЕС былі прыпыненыя ў 2020 годзе праз COVID-19. З таго часу яго так і не аднавілі. Пры гэтым грузы чыгункай працягваюць дастаўляцца.
Аператар кантэйнерных перавозак АТ «ОТЛК ЕРА» адзначаў, што ў першай палове 2024 года кантэйнерныя перавозкі на напрамках Кітай — Еўропа — Кітай праз тэрыторыю Казахстана, Расіі і Беларусі павялічыліся на 65,8% да 189,1 тыс. ДФЭ (дваццаціфутавы эквівалент — умоўная адзінка вымярэння ёмістасці грузавых транспартных сродкаў).
Расійска-беларускае вучэнне «Захад-2025» пройдзе 12−16 верасня. Яго заяўленая мэта — праверка магчымасцяў РФ і Беларусі па гарантаванні ваеннай бяспекі Саюзнай дзяржавы, гатоўнасці да адбіцця магчымай агрэсіі. Таксама паведамлялася, што вайскоўцы дзвюх краін падчас манеўраў адпрацуюць планаванне выкарыстання ядзернай зброі і «Арэшніка».
Чытайце таксама
