Жыхары Смаргоні летам сутыкнуліся з «частковым зрывам» гарадскіх аўтобусных маршрутаў: у мясцовым аўтапарку № 17 гэта патлумачылі «вострым дэфіцытам кадраў», да таго ж у ліпені адразу шэсць кіроўцаў аўтобусаў пайшлі на бальнічны, піша «Светлы шлях».
— Адна з прычын зрыву гарадскіх рэйсаў аўтобусных маршрутаў — востры дэфіцыт кадраў. На гэты момант у штаце 35 кіроўцаў аўтобусаў, пры гэтым 14 месцаў застаюцца вакантнымі. Менавіта такая колькасць персаналу неабходная для поўнага закрыцця маршрутнай сеткі без перапрацовак у кіроўцаў, — адзначыў дырэктар аўтапарка № 17 Сяргей Субаткевіч.
Ён падкрэсліў, што нядаўна заробак кіроўцаў аўтобусаў павысілі на 15%. Цяпер супрацоўнікі атрымліваюць поўны сацыяльны пакет, а «здзельная сістэма аплаты працы дае магчымасць добрага заробку пры ўмове актыўнай працы».
Дырэктар адзначыў, што асаблівая ўвага надаецца аптымізацыі маршрутаў. Нягледзячы на перавыкананне стандарту на некаторых лініях, нагрузка на аўтобусы размеркаваная нераўнамерна. У якасці рашэння плануецца «карэктаванне колькасці рэйсаў для больш рацыянальнага выкарыстання транспарту».
Нагадаем, падобная сітуацыя, калі рэйсы масава адмяняліся, адбылася ў Смаргоні і ў чэрвені. Тады тое гэта таксама патлумачылі недахопам кіроўцаў, а заадно і зносам машын на 67%.
Смаргонь — не адзіны беларускі горад, дзе аўтобусы не выходзілі на маршрут. Падобнае было, напрыклад, у Бабруйску — рэйсы пастаянна адмяняліся, прычым у аўтапарку сітуацыю спачатку тлумачылі проста недахопам кіроўцаў, потым — іх масавым сыходам на бальнічны.
Між тым у Беларусі назіраецца дэфіцыт кіроўцаў — іх патрабуецца больш за 10 тысяч.
