Падчас работ па рэканструкцыі мінскага Чырвонага касцёла (храма Святога Сымона і Святой Алены) будаўнікі збіраліся выкінуць пакінутыя там абразы і кнігі, паведамляе партал katolik.life.
Вернікі даведаліся, што ў храме, дзе нядаўна пачалася рэканструкцыя, знаходзяцца абразы, кнігі і іншыя рэлігійныя прадметы, якія не забралі адказныя асобы. Будаўнікі збіраліся выкінуць гэтыя рэчы на загад заказчыка — уласніка Чырвонага касцёла, дзяржпрадпрыемства «Мінская спадчына», сцвярджае партал.
Інфармацыю пра гэта данеслі да духавенства, але хуткай рэакцыі ад адказных асоб не было. Таму людзі самі пастараліся выратаваць ад «утылізацыі» абразы, партрэт заснавальніка касцёла Эдварда Вайніловіча, кнігі (у тым ліку Бібліі, лекцыянарыі, малітоўнікі), рэпрадукцыю Ісуса Міласэрнага. Некаторыя рэчы ўжо знаходзіліся ў сметніцы.
«Як даведаліся вернікі, у рэканструкцыі разам з беларусамі ўдзельнічаюць рабочыя з Туркменістана, дзе іслам — пераважная рэлігія. Таму яны былі яшчэ больш занепакоеныя сітуацыяй: які прыклад паказваюць хрысціяне прадстаўнікам іншай канфесіі ў стаўленні да сваіх святыняў? Здзіўленыя такім стаўленнем былі і беларускія будаўнікі», — піша партал.
Нагадаем, рамантаваць Чырвоны касцёл пачалі летам 2025 года. Паводле звестак katolik.life, у выпадку выканання плана рамонт мусяць завяршыць у снежні 2026 года, а ўвесці аб’ект у эксплуатацыю — у студзені 2027 года.
Да гэтага храм амаль тры гады прастаяў закрытым пасля таго, як 26 верасня 2022 года тут у нявысветленых абставінах здарыўся невялікі пажар. У выніку інцыдэнту раённая адміністрацыя забараніла эксплуатацыю будынка, унутр перасталі пускаць вернікаў і святароў.