Прадстаўнік Беларускага фонду спартыўнай салідарнасці (БФСС) Анатоль Котаў пяты дзень не выходзіць на сувязь. Пра гэта расказаў на сваёй старонцы ў Facebook кіраўнік аб’яднання Аляксандр Апейкін.
Вядома, што Анатоль Котаў 21 жніўня вылецеў з Варшавы ў Стамбул «па асабістых пытаннях».
«Увесь дзень быў на сувязі з роднымі і калегамі. У чацвер пасля 21.30 па польскім часе перастаў выходзіць на сувязь. З таго моманту на сувязь больш не выходзіў», — праінфармаваў Апейкін.
Родныя Анатоля падалі заяву ў турэцкую паліцыю і консульства Польшчы ў Стамбуле (Турцыя).
«Гэта адзіная дакладная інфармацыя. Любая іншая інфармацыя не адпавядае рэчаіснасці і з’яўляецца домыслам», — напісаў Апейкін, папрасіўшы ўсіх, каму што-небудзь вядома пра месцазнаходжанне Котава, пісаць яму ў асабістыя паведамленні.
Як удакладняе Reform.news, перад вылетам у Турцыю Котаў адпрасіўся з працы ў івэнт-агенцтве Terra Group, але не сказаў пра свае планы.
Нагадаем, Анатоль Котаў — былы генеральны сакратар НАК Беларусі. Ён таксама працаваў у амбасадзе Беларусі ў Польшчы, дырэкцыі Еўрапейскіх гульняў — 2019. У 2020 годзе Анатоль Котаў падаў у адстаўку з пасады намесніка загадчыка фінупраўлення ў Кіраўніцтве справамі прэзідэнта.
8 ліпеня 2024 года Анатоля Котава завочна прызналі вінаватым у змове з мэтай захопу дзяржаўнай улады неканстытуцыйным шляхам, кіраўніцтве «экстрэмісцкім» фарміраваннем, спрыянні «экстрэмісцкай» дзейнасці. Яму прызначылі 12 гадоў пазбаўлення волі.