Гісторыя беларускі Веранікі Казлоўскай, якая трапіла ў США за краты, атрымала працяг. 26 жніўня ў турме амерыканскага штата Нью-Мексіка адбылося папярэдняе судовае слуханне па іміграцыйнай справе Веранікі. Сям’я спадзявалася, што падчас яго ўсе прэтэнзіі да жанчыны будуць знятыя і яна зможа паехаць дадому да сына, якому няма яшчэ і года. Аднак гэтага не адбылося. Расказваем падрабязнасці.
— Паседжанне было хутчэй фармальнасцю. Вераніцы выставілі стандартнае абвінавачанне ў парушэнні іміграцыйнага заканадаўства — у тым, што яна прыехала ў ЗША і засталася ў краіне. Мая жонка прызнала гэты факт і адразу ж афіцыйна папрасіла палітычнага прытулку, гэта яе галоўны спосаба абароны ад дэпартацыі. Суд прыняў заяву і дазволіў падаць дакументы. Цяпер у нас ёсць тэрмін да 16 верасня, каб загрузіць у сістэму поўны пакет доказаў. Пасля гэтага будзе прызначаны фінальны суд, дзе справу разгледзяць па сутнасці. Хутчэй за ўсё, гэта адбудзецца ў кастрычніку ці лістападзе гэтага года, — расказаў «Люстэрку» падрабязнасці Роланд — муж беларускі.
Ён растлумачыў, што ключавым юрыдычным вынікам паседжання стала тое, што суд фактычна вылучыў справу Веранікі ў асобную вытворчасць. Раней яе права на знаходжанне ў ЗША разглядалася ў звязцы са справай былога мужа, разам з якім яна і падавала першае прашэнне на прытулак.
— У першым прашэнні Вераніка выступала як залежны член сям'і. Але калі яе арыштавалі і змясцілі ў міграцыйную турму, пачаўся асабісты працэс дэпартацыі. У гэтай новай юрыдычнай рэальнасці яе ранейшы статус перастаў быць абаронай. Адвакаты патлумачылі, што адзіны спосаб спыніць дэпартацыю — гэта падаць уласнае, незалежнае прашэнне на палітычны прытулак. Груба кажучы, Вераніка мае права жыць тут як маці амерыканскага грамадзяніна, але ў вачах іміграцыйнага суда гэтага недастаткова, каб проста адпусціць яе дадому, — кажа Роланд.
Сям’я актыўна рыхтуе дакументы. Ужо ўдалося атрымаць некалькі афідэвітаў (пісьмовае паказанне пад прысягай, якое выкарыстоўваецца ў судзе як доказ). «Люстэрку» вядома, што адзін з такіх дакументаў у падтрымку Веранікі быў скіраваны ад імені дарадцы Святланы Ціханоўскай па прававых пытаннях Леаніда Марозава.
Сям’я Веранікі працягвае збор сродкаў на аплату паслуг адваката і іншых выдаткаў, звязаных з яе затрыманнем.
Нагадаем, Вераніку Казлоўскую арыштавалі 16 траўня 2025 года ў штаце Флорыда. Нагодай стаў званок мінака ў паліцыю, які заўважыў яе пяцімесячнага сына аднаго ў аўтамабілі Tesla з уключаным клімат-кантролем. Нягледзячы на тое, што пракуратура штата, вывучыўшы справу, адмовілася выстаўляць супраць яе абвінавачанні, гэты інцыдэнт запусціў іншую працэдуру, і замест вызвалення жанчыну перавялі ў федэральную міграцыйную турму ў Нью-Мексіка, дзе яна знаходзіцца ўжо некалькі месяцаў. Увесь гэты час яна разлучаная са сваёй сям’ёй, ц тым ліку з грудным сынам.
Чытайце таксама
