Сайт kvitki.by перастаў адкрывацца ў Беларусі і за яе межамі, амаль усе старонкі кампаніі ў сацсетках выдаленыя. Мабільныя тэлефоны супрацоўнікаў недаступныя.
З сацсетак сэрвісу пакуль працуе толькі старонка ў Facebook. Тут апошняе паведамленне было апублікаванае 21 жніўня — анонс канцэрта.
На сайце Вялікага тэатра гаворыцца, што ў kvitki.by адбыўся «тэхнічны збой».
«У гэты момант на сайце білетнага аператара www.kvitki.by узніклі тэхнічныя праблемы, у сувязі з чым прыпыненая магчымасць набыцця білетаў на спектаклі Вялікага тэатра Беларусі. Каманда www.kvitki.by прыкладае ўсе намаганні для найхутчэйшай ліквідацыі праблемы і аднаўлення паўнавартаснай працы сэрвісу. Як толькі сэрвіс будзе цалкам адноўлены, мы паведамім пра гэта», — гаворыцца на сайце тэатра.
Падобнае паведамленне размешчанае на сайце цэнтра культуры «Віцебск»:
«У сувязі з тэхнічнымі збоямі ў працы білетнага аператара „КВІТКІ“ на фестываль ПОЙМА можна набыць у касах установы і ў білетнага аператара TICKETPRO.BY. Білеты на фестываль (і іншыя праекты цэнтра культуры), набытыя раней, сапраўдныя».
«Люстэрка» паспрабавала датэлефанавацца па гарадскіх тэлефонах кампаніі і на мабільныя тэлефоны супрацоўнікам, якія адказваюць за продаж білетаў юрыдычным асобам, — усе тэлефоны недаступныя.
Нагадаем, 14 жніўня стала вядома, што затрыманы дырэктар Палаца Рэспублікі і дэпутат Мінгарсавета Максім Прыходскі па падазрэнні ў карупцыі.
19 жніўня «Наша Ніва» са спасылкай на крыніцы паведаміла, што сілавікі прыйшлі і па прыватнікаў: затрымалі дырэктара кампаніі тэхнічнага абсталявання для мерапрыемстваў Blackout Studio Іллю Піятроўскага і Аляксандра Манышава, арганізатара канцэртаў, які мае дачыненне да агенцтваў «Атам Інтэртэймент» і «Анбрэйкбл» і абслугоўваў праўладныя мерапрыемствы.