Міністэрства антыманапольнага рэгулявання і гандлю перасцерагло сэрвіс «Аплаці» перад уводам платнай паслугі для куплі білетаў на транспарт, паведаміла прэс-служба ведамства. Кампанія прыслухалася да парады ведамства і адмовілася ад увядзення падпіскі «да высвятлення шэрагу параметраў».
Платная паслуга ў аплікацыі «Аплаці» мусіла запрацаваць з 22 верасня. За адзін рубель на месяц карыстальнікі атрымлівалі магчымасць купляць праз аплікацыю білеты на грамадскі транспарт.
У МАРГ вывучылі анонс, які быў размешчаны на сайце «Аплаці», і 27 жніўня перасцераглі кампанію «перад здзяйсненнем планаваных дзеянняў».
«Гэта звязана з рызыкай парушэння Закона „Пра супрацьдзеянне манапалістычнай дзейнасці і развіцці канкурэнцыі“», — растлумачылі ў ведамстве.
Перасцярога — гэта прэвентыўны інструмент антыманапольнага органа, які выдаецца, калі антыманапольнаму органу стала вядома пра дзеянні, якія толькі плануюцца суб’ектам. Асноўная мэта — перасцерагчы суб’екта наконт таго, што такія дзеянні могуць прывесці да парушэння антыманапольнага заканадаўства.
У кампаніі адзначылі, што іх дзеянні «не парушалі і не парушаюць заканадаўства Рэспублікі Беларусь», але перасцярогу МАРГ прынялі да ўвагі.
«Улічваючы прапанову рэгулятара і акцэнт на шэрагу момантаў, агучаных падчас асабістай сустрэчы кіраўнікоў, у гэтай сітуацыі кампанія прыняла рашэнне адмяніць увядзенне абавязковай платы за паслугу да высвятлення шэрагу параметраў. <…> Прынятае рашэнне дазволіць у камфортных умовах правесці неабходную дадатковую працу для максімальнага выключэння ў будучыні неўрэгуляваных сітуацый з зацікаўленымі структурамі ў краіне», — расказалі ў «Аплаці».