У Гродзенскай вобласці праходзяць масавыя затрыманні па справе «Беларускага Гаюна», паведамляе тэлеграм-канал «Суды, задержания. Гродно и область».
Дакладная колькасць затрыманых невядомая, афіцыйнай інфармацыі пра тое, што адбываецца, няма.
Нагадаем, паводле інфармацыі «Флагштока», фігурантамі «справы Гаюна» з пачатку 2025 года таксама магло стаць больш за 250 жыхароў Гомельскай вобласці.
Афіцыйныя ведамствы і дзяржаўныя СМІ інфармацыі пра колькасць затрыманых не публікавалі. Праваабарончаму цэнтру «Вясна», станам на 27 жніўня, былі вядомыя прозвішчы як мінімум 53 фігурантаў. Прыблізную колькасць затрыманых у Гомельскай вобласці «Флагшток» вывеў, пагаварыўшы з сябрамі і блізкімі затрыманых.
«Некаторыя з іх выпадкова даведаліся пра больш чым 250 арыштаваных па крымінальным артыкуле пра „спрыянне экстрэмісцкай дзейнасці“ жыхароў Гомельскай вобласці, якія дасылалі паведамленні „Гаюну“. Акрамя таго, у спісах на затрыманне можа знаходзіцца агулам больш чым тысяча чалавек», — піша «Флагшток».
Выданне адзначае, што «сілавікі па чарзе адпрацоўваюць тых, хто трапіў у спіс». Адзін з суразмоўцаў расказаў журналістам, што фігурантаў «бяруць пачкамі — аформілі, паехалі па новых».
Паводле звестак «Флагштока», сілавікі прыходзяць «да ўсіх, хто пісаў што-небудзь „Гаюну“», і ў іх «ёсць ID усіх, хто дасылаў паведамленні» ў тэлеграм-канал. Таксама аператыўнікам даступныя «тэксты паведамленняў і назвы адпраўленых кожным карыстальнікам файлаў, але няма саміх файлаў, а толькі „іконкі“ фота і відэа», піша выданне.
Нагадаем, маніторынгавы праект «Беларускі Гаюн» сярод іншага рэгулярна інфармаваў пра расійскія ўдарныя дроны, што заляцелі ў нашую краіну. У лютым 2025 года ён спыніў працу. Гэта адбылося пасля таго, як стала вядома пра ўцечку звестак «Гаюна» і людзі, якія дасылалі інфармацыю, аказаліся ў небяспецы.
З таго часу неаднаразова паведамлялася пра затрыманні, падставай для якіх сталі дасланыя ў «Беларускі Гаюн» фота і відэа з расійскімі вайскоўцамі і тэхнікай.