Яшчэ 2 верасня Вольга Карпушонак, якая абвінаваціла кіраўніка НАУ Паўла Латушку ў сэксуальных дамаганнях, паведаміла, што падала заяву на палітыка ў праваахоўныя органы Польшчы і Іспаніі. Дагэтуль пацверджання гэтай інфармацыі не было. «Люстэрка» скіравала запыт у Нацыянальную пракуратуру Польшчы наконт таго, ці паступала да іх адпаведная заява. Вось што нам адказалі.
«Люстэрка» спытала Нацыянальную пракуратуру Польшчы, ці паступала да іх заява ад Вольгі Карпушонак і ці распачатая ў сувязі з гэтым праверка ці іншыя працэсуальныя дзеянні.
— Пацвярджаем, што заява [ад Вольгі Карпушонак] атрыманая, але яшчэ не зарэгістраваная, — гаворыцца ў адказе прэс-службы Нацыянальнай пракуратуры Польшчы.
Ведамства не паведаміла, калі менавіта атрымала заяву. Таксама ў адказе няма інфармацыі пра пачатак расследавання ці адмову ад яго (паводле пар. 1 арт. 305 Крымінальна-працэсуальнага кодэкса Польшчы, зрабіць гэта трэба неадкладна пасля атрымання паведамлення пра злачынства).
Пракуратура не можа ігнараваць заяву, але адмова магчымая, калі ў заяве няма дастатковых падставаў для пачатку следства. У выпадку ўзнікнення неабходнасці ў дадатковай праверцы фактаў закон адводзіць пракуратуры 30 дзён з моманту атрымання заявы для прыняцця рашэння.
Адзначым, аналагічны запыт быў скіраваны «Люстэркам» у Генеральную пракуратуру Іспаніі, але адказ з гэтага ведамства пакуль не прыйшоў.
Нагадаем, 5 верасня Павел Латушка паведаміў, што падаў пазоў у Акруговы суд раёна Варшава-Прага пра ахову гонару і годнасці ў дачыненні да юрысткі Вольгі Карпушонак.
Што здарылася?
30 жніўня сябра Каардынацыйнай рады і былая адвакатка Вольга Карпушонак апублікавала ў Facebook абвінавачанні супраць кіраўніка Народнага антыкрызіснага ўпраўлення (НАУ) Паўла Латушкі. У пасце, які яна назвала «споведдзю пра мужчынскую жорсткасць сярод сваіх», жанчына абвінаваціла палітыка ў дамаганнях і пагрозах.
Са словаў Карпушонак, у 2024 годзе яна была вымушаная пакінуць Украіну праз ціск СБУ. У гэты момант Латушка асабіста і праз калег запрасіў яе на працу ў НАУ ў Польшчу, паабяцаўшы «пратэкцыю, грошы і спакой».
Карпушонак сцвярджае, што практычна адразу пасля пераезду Латушка запрасіў яе ў рэстаран у цэнтры Варшавы, дзе казаў пра жаданне бачыць побач «разумную прывабную дзяўчыну, вартую таго, каб у будучыні стаць „першай лэдзі“». Калі жанчына выказала незадаволенасць паўторным запрашэннем у рэстаран, палітык, з яе словаў, пачаў дамагацца, а пасля адмовы пагражаў «праблемамі ў Польшчы», абяцаючы «расказаць пра яе такое», што яе «альбо пасадзяць у турму, альбо выправадзяць у Беларусь».
Павел Латушка адмаўляе ўсе абвінавачванні і кажа, што гэта аперацыя спецслужбаў. Палітык заяўляе, што «КДБ каардынуе і кіруе дзейнасцю Вольгі Карпушонак», а на яе старонцы «могуць быць апублікаваныя выключна падрыхтаваныя спецслужбамі псеўдадоказы».
«Ніякіх сустрэч, рэстаранаў і ўжо тым больш харасменту не было і не магло быць», — сцвярджае кіраўнік НАУ.
1 верасня Вольга Карпушонак апублікавала ў Facebook відэа, у якім заявіла, што пасля абвінавачанняў супраць кіраўніка Народнага антыкрызіснага ўпраўлення Паўла Латушкі ў дамаганнях і пагрозах сутыкнулася з велізарным ціскам з боку СМІ і асобных калег.
2 верасня Вольга Карпушонак паведаміла ў сацсетках, што пакінула Еўрасаюз і падала заяву на палітыка ў праваахоўныя органы Польшчы і Іспаніі.
Павел Латушка заявіў, што гэтым крокам яна спрабуе «працягваць інфармацыйную атаку».
3 верасня ў сеціве з’явіўся ліст, які нібыта адправіла ў ПАРЕ Карпушонак.
У ім паўтараюцца раней агучаныя актывісткай абвінавачанні супраць Паўла Латушкі і выказваецца просьба праверыць яго паводзіны.
Павел Латушка заявіў, што гэта праца КДБ.
Чытайце таксама
