Былы палітвязень Аляксандр Лаўрэнцьеў адбываў пакаранне ў наваполацкай папраўчай калоніі № 1 і працаваў падсобным рабочым. Ён паказаў у сацсетках свой разліковы ліст — сярэдні заробак складае 27,54 рубля, звярнуў увагу тэлеграм-канал «Право имеют».
Аляксандр працаваў падсобным рабочым першага разраду ў філіяле «Тэхнатара» дзяржпрадпрыемства ПК 13-Беразвечча, які займаецца вытворчасцю поліэтыленавай плёнкі, сеткі, паддонаў, цвікоў, гаспадарчага мыла і іншых тавараў.
З ліпеня 2024-га да чэрвеня 2025-га Лаўрэнцьеў афіцыйна зарабіў усяго 330,48 рубля. Яго «рэкордным» заробкам сталі 37,96 рубля ў кастрычніку 2024-га, у сярэднім жа выходзіла блізу 27,5 рубля. Сам ён з іроніяй дадаў, што палову гэтай сумы «забіраюць за ўтрыманне ў палоне і рабстве».
«Кажаце, у нас няма рабства? Даведка пра зарплату пры поўным тыдні з 8 раніцы да 17 гадзін у канцэнтрацыйным лагеры ПК-1 Наваполацк. І так, 5−6 дзён на тыдзень ходзяць толькі палітычныя асуджаныя. Гвалтаўнікі, вычварэнцы і забойцы ходзяць усяго тры дні на тыдзень, яны не небяспечныя проста…» — напісаў мужчына.
У жніўні 2022 года гродзенцу Аляксандру Лаўрэнцьеву прызначылі 3 гады і 4 месяцы калоніі агульнага рэжыму за абразу Лукашэнкі і прадстаўніка ўлады. Яго затрымалі пасля вяртання з Польшчы. Пазней яму дадалі яшчэ год зняволення ў калоніі па арт. 411 КК (Злоснае непадпарадкаванне патрабаванням адміністрацыі папраўчай установы). Мужчына выйшаў на волю ў чэрвені 2025 года.
Нагадаем, у наваполацкай папраўчай калоніі № 1 знаходзяцца ў прыватнасці Віктар Бабарыка і Андрэй Пачобут.