У панядзелак у Белым доме заявілі, што наступным крокам мірнага ўрэгулявання ва Украіне будзе двухбаковая сустрэча прэзідэнта Расіі Уладзіміра Пуціна і прэзідэнта Украіны Уладзіміра Зяленскага. Аднак Расія дагэтуль не дала адназначнага адказу. І гэта не здзіўляе, піша CNN.
Гэтую вайну пачаў Уладзімір Пуцін, аднабакова прызнаўшы незалежнасць часткі ўкраінскай тэрыторыі (самаабвешчаных Данецкай і Луганскай Народных рэспублік). Ён сцвярджаў, што Украіна — «неад'емная частка гісторыі, культуры і духоўнай прасторы [Расіі]», і яе аддзяленне — гістарычная памылка.
Так што калі гэтая сустрэча ўсё ж адбудзецца, то, як сказала CNN кіраўніца Украінскага форуму ў рамках праграмы па Расіі і Еўразіі ў Chatham House Арыся Луцэвіч, «Пуціну давядзецца змірыцца з правалам: ён сядзе за стол перамоваў з прэзідэнтам, якога лічыць блазнам, з краіны, якой, на яго думку, не існуе».
Яна таксама адзначыла, што гэта будзе значыць рэзкае змяненне танальнасці, якое будзе цяжка растлумачыць расіянам. «[Пуцін] так моцна прамываў мазгі расіянам на дзяржаўным тэлебачанні, што Зяленскі — нацыст, што [Украіна] - марыянеткавая дзяржава Захаду… што Зяленскі нелегітымны, чаму ён раптам з ім размаўляе?»
CNN нагадвае, што Крэмль увесь час ставіць пад сумнеў легітымнасць украінскага прэзідэнта і яшчэ нядаўна патрабаваў, каб Украіна правяла выбары да падпісання любой канчатковай мірнай дамовы. Пуцін і іншыя крамлёўскія чыноўнікі рэдка вымаўляюць прозвішча Зяленскага, аддаючы перавагу замест гэтага словам «кіеўскі рэжым». Акрамя таго, менавіта Уладзімір Зяленскі паляцеў у Турцыю на першыя прамыя перамовы паміж двума бакамі ў сярэдзіне траўня, а Пуцін адправіў туды малапрадстаўнічую дэлегацыю.
Палітолаг Таццяна Станавая дапусціла, што Расея, каб утрымаць ЗША на сваім баку, можа прапанаваць новы раўнд перамоваў у Стамбуле з дэлегацыяй больш высокага ўзроўню. Магчыма, з удзелам памочніка прэзідэнта РФ Ушакова і міністра замежных справаў Лаўрова. Аднак Пуцін не пойдзе на рызыку «засады», згаджаючыся на сустрэчу з Зяленскім, толькі каб пачуць адмову на ўсе свае патрабаванні.
У Пуціна няма прычын здавацца на гэтым этапе. Не пайшоўшы ні на якія саступкі, ён быў узнагароджаны грандыёзным самітам на Алясцы, адмовай Трампа ад патрабавання падпісаць перамір'е перад мірнымі перамовамі і крахам усіх выстаўленых дагэтуль санкцыйных ультыматумаў. Адзіным непрадказальным фактарам для Расіі на гэты момант застаецца тое, каго Трамп абвінаваціць, калі ягоныя апошнія намаганні па ўсталяванні міру праваляцца, рэзюмуе CNN.
Нагадаем, сустрэчу Зяленскага з Пуціным анансаваў Трамп. Ён расказаў, што 18 жніўня пасля заканчэння перамоваў у Белым доме патэлефанаваў Пуціну.
Зяленскі на брыфінгу ў Вашынгтоне пацвердзіў, што рыхтуецца спачатку яго двухбаковая сустрэча з Пуціным, а потым — трохбаковая з удзелам Трампа.
Прэзідэнт Украіны заявіў, што гатовы сустрэцца з Пуціным без усялякіх умоваў: «Бо калі мы пачнём патрабаваць папярэдняга спынення агню, Расія пачне высоўваць сотню іншых умоваў».
Паводле канцлера Германіі Фрыдрыха Мерца, сустрэча Зяленскага з Пуціным пройдзе ў найбліжэйшыя два тыдні. «Ці хопіць у расійскага прэзідэнта смеласці наведаць такі саміт, мы не ведаем», — дадаў Мерц.
Сярод магчымых месцаў сустрэчы называліся Венгрыя і Швейцарыя.
