Вялікая група дэпартаваных з ЗША расіян была дастаўленая самалётам з Каіра (Егіпет) у аэрапорт Дамадзедава (Расія) 27 жніўня, расказаў «Агентству» прэзідэнт Russian America for Democracy in Russia Дзмітрый Валуеў (яго арганізацыя дапамагае грамадзянам РФ, якія апынуліся ў іміграцыйных турмах).
Рэйсам прыляцела ад 30 да 60 дэпартаваных. Гэта былі расіяне, якія апынуліся ў іміграцыйных турмах у ЗША, прайгралі суды наконт прытулку або выбралі самадэпартацыю (то-бок вырашылі вярнуцца на радзіму, не чакаючы суда), удакладніў актывіст.
Вядома, што сярод высланых у Расію было некалькі чалавек, якія баяліся палітычнага пераследу ў Маскве. Крыніца, знаёмая з ходам дэпартацыі, паведаміла «Агентству», што на борце быў былы вайсковец, супраць якога ў Расіі завялі справу пра самавольнае пакіданне часткі. Ён спрабаваў атрымаць прытулак у ЗША, але прайграў суд.
Паводле інфармацыі Валуева, памежнікі, імаверна, ведалі пра тое, што рэйсам з Каіра прыляцелі дэпартаваныя з ЗША. З людзьмі доўга гаварылі падчас праходжання мяжы. Валуеў ведае толькі пра аднаго затрыманага падчас гэтага, у астатніх вядомых яму выпадках (каля дзесяці) людзі засталіся на волі. Кагосьці адпусцілі пад падпіску пра нявыезд, удакладніў суразмоўца «Агентства».
Гэта ўжо другая масавая дэпартацыя расіян з ЗША за гэтае лета — у чэрвені амерыканскія ўлады выслалі з краіны каля 40 чалавек.